काठमाडौँ। यूएईमा भइरहेको आईसीसी यू-१९ विश्वकप एसिया छनोटको अन्तिम खेलमा नेपालले आज घरेलु टोली यूएईसँग खेल्दैछ।
६ राष्ट्र सहभागी छनोट प्रतियोगितामा यस खेल जित्ने टोली अर्को वर्ष श्रीलंकामा आयोजना हुने यू-१९ विश्वकपमा छनोट हुनेछ। त्यसैले दुवै टोली जितसहित विश्वकपमा पुग्ने लक्ष्यमा छन्। सन् २०१६ पछि यू-१९ विश्वकप नखेलेको नेपाली युवा टोली यसपटक जसरी छनोट हुने लक्ष्यसहित यूएई पुगेको थियो ।
यसअघि राउण्ड रोविनका चारवटै खेल जित्दै आत्मविश्वासी बनेको नेपाली यू-१९ टोली अन्तिम खेल जित्दै ८ वर्षपछि यू-१९ विश्वकपमा छनोट हुने लक्ष्यमा छ । छनोटमा नेपालले यसअघि सिंगापुरलाई ९६ रनले, कुवेतलाई २४३ रनले, हङकङलाई ९ विकेटले तथा मलेसियालाई १० विकेट हराइसकेको छ । लिगको खेल भएपनि यूएईविरुद्धको खेल फाइनल जस्तै हुनेछ । जित्ने टिम यू-१९ विश्वकपमा पुग्नेछ भने हार्ने टिमको विश्वकप खेल्ने सम्भावना सकिनेछ ।
नेपाल यू-१९ टिमले सन् २०१६ मा पछिल्लो पटक बंगलादेशमा यू-१९ विश्वकप खेलेपछि उमेर समूहको टिमले फेरि विश्वकप खेल्न सकेको छैन । पछिल्लो तीन यू-१९ विश्वकपमा नेपाल छनोट हुनै सकेन । सन् २०१८ मा भएको यू-१९ विश्वकपमा नेपाल अफगानिस्तान भन्दा पछि पर्दै छनोट हुन सकेन । पछिल्ला दुई संस्करणमा भने नेपालका लागि यूएई नै बाधक बनेको थियो ।
२०२० को विश्वकप छनोटमा नेपाल यूएईसँग वर्षाले प्रभावित खेलमा १ रनले पराजित भएको थियो र त्यही १ रनको हार नै नेपालको लागि विश्वकपको ढोका बन्द गर्न निर्णायक बन्यो ।
त्यसबेला नेपालले दिएको २४७ रनको लक्ष्य पछ्याएको यूएईले ३० ओभरमा ३ विकेट गुमाएर १२२ रन बनाउँदा वर्षाका कारण खेल नै रद्ध भएपछि डकवर्थ लेविस नियमले यूएई १ रनले विजयी भएको थियो ।
गत वर्ष यू-१९ विश्वकप हुँदा कोभिड-१९ को कारण एसिया लगायत केही क्षेत्रको छनोट प्रतियोगिता हुन सकेन । नेपाल युवा टोलीले छनोट प्रतियोगिता जित्नदै विश्वकप खेल्ने लक्ष्य राखेको थियो । तर यस पटक कोभिड १९ बाधक बन्दा यूएई फेरि भाग्यमानी बन्यो भने नेपाल अभागी बन्यो । आईसीसीले यू-१९ विश्वकपको पछिल्ला पाँच छनोट प्रतियोगिताको आधारमा टिम छान्नदा नेपालभन्दा अघि रहँदै यूएईले गत वर्ष यू-१९ विश्वकप खेल्यो ।
उता यूएईका टप अर्डरले उत्कृष्ट प्रदर्शन गरिरहेको छ । ओपनर आर्यन सक्सेना, आर्यशं शर्मा र ध्रुव पारासारले राम्रो ब्याटिङ गरिरहेका छन्। ध्रुवले अलराउण्ड प्रदर्शन गरेका छन्। उनले एक खेलमा ५ विकेट समेत लिएका थिए। ध्रुवले दुई अर्धशतक बनाउनुका साथै १० विकेट लिइसकेका छन् । यूएईको मिडल अर्डर खासै परीक्षण हुन पाएको छैन।
बलिङमा कप्तान आर्यन खानलाई ध्रुवसहित हर्सिथ सेट, अरित सेट्टी र अमर बदामीले राम्रो साथ दिइरहेका छन्। चार टिम नेपाल र यूएई भन्दा तुलानात्मक रुपमा केही तल रहेकोले नेपाल र यूएईको मुख्य परीक्षा अन्तिम खेलमै हुनेछ।
