काठमाडौं । संसदीय समितिले शनिबार आगलागी भएको खानेपानी मन्त्रालयको अनुगमन गरेको छ । आज आइतबार प्रतिनिधिसभाअन्तर्गतको पूर्वाधार विकास समितिले आगलागी भएको खानेपानी मन्त्रालयको मन्त्री प्रदीप यादवको कार्यकक्षको अनुगमन गरेको हो ।
अनुगमन, निरीक्षणपछि सञ्चारकर्मीसँग कुरा गर्दै समिति सभापति दीपकबहादुर सिंहले आगलागीको बारेमा निरीक्षण गर्न समितिका सबै सदस्यहरू आएको र आगलागीबाट केही सम्पत्तिको क्षति भएको बताए ।
उनले भने, ‘आगलागी भएको स्थानमा निरीक्षण गर्न आएका हौँ । पूर्वाधार विकास समितिका सम्पूर्ण आउनुभएको छ । घटनाले जनको क्षति भएन, धनको क्षति भएको छ । डकुमेण्टहरुमा केहीपनि आगो लागेको छैन भनिएको छ ।’
साथै उनले यो घटनाले सिंहदरबारभित्रका कार्यालयहरुको वायरिङका कारण पहिलादेखि नै हाइअलर्टमा बस्नुपर्ने महशुस समितिले गरेको बताए ।
यसअघि आगलागीपश्चात् उपप्रधानमन्त्री तथा सहरी विकासमन्त्री प्रकाशमान सिंह, गृहमन्त्री रमेश लेखक, ऊर्जा, खानेपानीमन्त्री प्रदीप यादव, ऊर्जा, जलस्रोत तथा सिंचाइमन्त्री दिपक खड्का, तथा मन्त्रालयका उच्चपदस्थ कर्मचारी तथा सुरक्षा निकायका प्रमुखबाट घटनाको स्थलगत निरीक्षण गरी क्षतिबारे जानकारी लिने काम भएको थियो ।
