सन्तोषी रावल । बाजुराको बुढिगंगा नगरपालिका–४ मा सार्वजनिक सुनुवाई कार्यक्रम सम्पन्न भएको छ । वडा कार्यालयको आयोजना र नगरपालिकाको समन्वयमा आयोजित यस कार्यक्रममा २०७९ देखि ८१ सम्मका योजना, कार्यक्रम र आयव्ययको विवरण प्रस्तुत गरिएको थियो । वडाअध्यक्ष मिनबहादुर शाहका अनुसार यो कार्यक्रम जनप्रतिनिधिहरूलाई उत्तरदायी बनाउन र सुशासनलाई मजबुत बनाउन आयोजित गरिएको हो ।
सार्वजनिक सुनुवाई कार्यक्रममा नागरिकहरूले जनप्रतिनिधिहरूलाई प्रश्न गर्दै आलोचना र समालोचना गरेका थिए । बुढिगंगा नगरपालिका विकासमा प्रगति भएको भए पनि नागरिकहरूले आधारभूत आवश्यकता पूरा गर्न माग गरेका छन ्। नगरप्रमुख रामबहादुर बानियाले अढाई वर्षको अवधिमा सडक, शिक्षा, स्वास्थ्य जस्ता क्षेत्रमा प्रगति भएको बताए पनि नागरिकहरूको आधारभूत आवश्यकताहरू पुरा नभएको स्वीकार गरेका छन्। खानेपानीको समस्या खासै समाधान नभएको वडाअध्यक्ष शाहले उल्लेख गरे, जबकि केही गाउँहरूमा पानी पुर्याउनका लागि अन्य गाउँबाट पाइपलाइन जोड्ने व्यवस्था गरिएको छ ।
नगरप्रमुख बानियाले कृषि क्षेत्रमा पनि ध्यान दिँदै नागरिकलाई उत्पादनसँग जोड्नका लागि विभिन्न कार्यक्रमहरूको आयोजना गरिएको जानकारी दिए । यस कार्यक्रममा उपप्रमुख माया खड्काले पालिकाको समृद्धि यात्रामा अघि बढ्दै शिक्षा र स्वास्थ्यलाई प्राथमिकता दिएको बताइन् । कार्यक्रममा वडावासिहरुको जम्बो सहभागिता रहेको थियो । उक्त कार्यक्रमको सहजिकरण प्रत्रकार महासंघका उपाअध्यक्ष रमित विकले गर्नु भएको हो ।
