बारा, २३ जेठ। जिल्ला प्रहरी कार्यालय बारा र लागु औषध नियन्त्रण व्यूरो शाखा कार्यालय वीरगंजबाट संयुक्त रुपमा खटिएको प्रहरी टोलीले कलैया उपमहानगरपालिका– ६ हनुमान चोकबाट लागुऔषध सहित ४ जना युवकलाई पक्राउ गरेको छ।
विशेष सूचनाको आधारमा बिहिवार साँझ एकआपसमा लेनदेन गर्दै गरेको अवस्थामा प्रतिबन्धित लागू औषध नाईट्रोभेट ट्याब्लेटसहित ४ जना युवकलाई नियन्त्रणमा लिई आवश्यक कानूनी कारवाही प्रकृया अगाडी बढाईएको हो।
पक्राउ पर्नेमा कलैया उप-महानगरपालिका– ४ बस्ने वर्ष २६ को मुकेश साह कलवार ,वडा ९ रामपुर बस्ने वर्ष २० को सुमन चौहान सोही ठाउँ बस्ने वर्ष २४ को प्रदिप कुमार साह र वडा २७ बस्ने वर्ष १९ को धिरेन्द्र कुशवाहा रहेको जिल्ला प्रहरी प्रवक्ता डिएसपी विजयराज पण्डितले न्युज कारखानालाई बताए ।
उनीहरूको साथबाट प्रतिबन्धित लागू औषध नाईट्रोभेट १० लेखिएको ३५ पत्ता १ हजार ३५ ट्याबलट बरामद गरिएको डिएसपी पण्डितले जानकारी दिएका छन्। उनीहरूमाथि लागुऔषध सम्बन्धी मुद्दा दायर गरी जिल्ला अदालत बाराबाट म्याद थमाई थप अनुसन्धान भइरहेको जिल्ला प्रहरी कार्यालय बाराको सूचनामा उल्लेख गरिएको छ।
