भक्तपुर, ७ असार : नगरकोट भ्रमण वर्ष–२०८२ को अवसरमा आज आयोजित २५ किलोमिटर साइक्लिङ एवं हाइकिङ यात्रा सम्पन्न भएको छ । चाँगुनारायण नगरपालिका–९ स्थित ब्रम्हायणी मन्दिरमा चाँगुनारायण नगरपालिका प्रमुख जीवन खत्रीले आज बिहान साइकल यात्राको उद्घाटन गर्नुभएको थियो ।
उक्त साइकल यात्रा साँझ ताथलीको फैढोकामा आइपुगेको हो । साइक्लिङमा २७६ जना सहभागी थिए । नगर प्रमुख खत्रीले नगरपालिका क्षेत्रका सम्पदालाई विश्वस्तरमा पु¥याउन नगरकोट भ्रमण वर्ष २०८२ घोषणा गरिएको बताउँदै युवा पुस्ता सक्रिय भएर लागे पर्यटनको विकास मात्रै नभइ समग्र आर्थिक एवं भौतिक विकासमा टेवा पुग्ने बताउनुभयो ।
कार्यक्रममा चाँगुनारायण नगरपालिका–९ का वडाध्यक्ष गणेश त्यातले ताथलीमा विश्वकै दुर्लभ चट्टान अभिलेख भएको बताउनुभयो । नगरकोट भ्रमण वर्ष २०८२ का विज्ञ डा घनश्याम खतिवडाले ऐतिहासिक क्षेत्र पर्यटकका लागि आकर्षक गन्तव्यका रुपमा विकास गर्नुपर्नेमा जोड दिनुभयो ।
साइक्लिङमा सहभागी विश्व साइकलयात्री पुष्कर शाहले ताथलीका विभिन्न स्थानमा साइक्लिङ गर्न पाउँदा बेग्लै अनुभव गर्न पाएको प्रतिक्रिया दिनुभयो । कार्यक्रममा कलाकार सम्राट सापकोटा, ब्रेभ राइडर कमला पुन, फरक क्षमताका साइक्लिष्ट पुरूषोत्तम साहुखललगायतलाई जनप्रतिनिधिले प्रमाणपत्र एवं मायाको चिनो वितरण गर्नुभएको थियो ।
त्यसैगरी सञ्चारकर्मी हरिसुन्दर छुकाङद्वारा सम्पादित ‘हाम्रो ताथली’ पत्रिका विमोचन गरिएको थियो । कार्यक्रममा आयोजक समूहका अध्यक्ष सुरेशराज गिरीले ओझेलमा परेको पर्यटकीय क्षेत्रका बारेमा साइकल यात्रीहरुलाई जानकारी दिँदै यसको विश्वव्यापी प्रचार गर्न साइक्लिङ तथा हाइकिङ कार्यक्रम गरिएको बताउनुभयो ।
