मकवानपुर । बकैया गाउँपालिकामा पहिलो पटक आयोजना गरिएको ‘प्रथम बकैया खुल्ला फुटबल प्रतियोगिता’ मंगलबारदेखि सुरु भएको छ । बागमती प्रदेश सभा सदस्य प्रेम बहादुर पुलामीले प्रतियोगिताको उद्घाटन गरेका हुन् ।
बागमती खेलकुद विकास समितिको आयोजनामा वडा नम्बर ३ स्थित बकैया खेलमैदानमा सुरु प्रतियोगिताको उद्घाटन खेलमा आयोजक बी टिमले वडा नम्बर ८ लाई टाइब्रेकरमा ४–१ गोलले पराजित गर्दै विजयी सुरुवात गरेको हो । निर्धारित समयमा खेल गोलरहित बराबरीमा टुंगिएपछि खेल टाइब्रेकरमा पुगेको थियो । खेलका म्यान अफ द म्याच आयोजक टिमका गोलरक्षक तारा नेगी घोषित भए ।
प्रतियोगिता अन्तर्गत बुधबार तीन खेल सञ्चालन हुने कार्यक्रम छ । बिहानको पहिलो खेलमा एकता बैण्ड एफसी र बिग ब्वाइज एफसी, दिउँसो १ बजे जीवन ज्योति युवा क्लब र लेभल अप मकवानपुर, र दिउँसो ३ बजे आयोजक ए र बागमती गाउँपालिकाको टिम बीच प्रतिस्पर्धा हुनेछन् ।
