हेटौंडा । हेटौंडा उपमहानगरपालिकाको प्रमुख पहिचानमध्येको सहिद स्मारक पार्क अहिले आन्तरिक तथा बाह्य पर्यटकहरूको प्रमुख गन्तव्य बनेको छ।
प्राकृतिक सौन्दर्य, ऐतिहासिक महत्व र व्यवस्थित संरचनाका कारण यो पार्कमा दैनिक सयौँको संख्यामा आगन्तुकहरूको भीड बढ्न थालेको छ। स्थानीय प्रशासनका अनुसार अहिले सहिद स्मारक पार्क साँझ १० बजेसम्म सर्वसाधारणका लागि खुला रहने व्यवस्था गरिएको छ, जसले पर्यटक आकर्षण अझै बढाएको छ।
स्मारकमा विशेषगरी हेटौंडा र वरपरका जिल्लाबाट घुम्न आउनेहरू मात्रै नभई काठमाडौं, चितवन, बारा, पर्सा, सर्लाही, र नवलपुर क्षेत्रका पर्यटकहरूको पनि चहलपहल देखिन्छ। दशैं र तिहारलगायत चाडपर्वको समयमा त यहाँ दैनिक हजारौँ पर्यटक आउने गर्छन्। सँगै पार्कमा रहेका विश्रामस्थल, खेलमैदान, नन्दनवन, झरनाको दृश्य र हरियालीले आगन्तुकलाई थप आकर्षित बनाएको छ।
हेटौँडा उपमहानगरपालिका–११ मा अवस्थित सहिद स्मारक पार्क ऐतिहासिक दृष्टिले पनि महत्वपूर्ण छ। देशका स्वतन्त्रता, लोकतन्त्र र परिवर्तनका लागि आफ्नो जीवन बलिदान गर्ने सहिदहरूको स्मृतिमा बनाइएको यो स्मारक राष्ट्रिय गौरवको प्रतीकको रूपमा लिइन्छ। यहाँ स्थापना गरिएका सहिदका प्रतिमाहरू, कलात्मक बगैँचा, पिकनिक स्थल र दृश्यावलोकन टावरले यसको सौन्दर्यमा थप रंग भरेका छन्।
उपमहानगरका अनुसार पछिल्ला वर्षहरूमा यहाँको व्यवस्थापनमा सुधार ल्याइँदै आएको छ। पार्कभित्र शौचालय, बत्ती, विश्रामकुर्सी, क्याफे, टिकट काउन्टर र सुरक्षा व्यवस्थालाई सुदृढ बनाइएको छ। साँझपख बत्तीले उज्यालो बनेपछि यहाँको दृश्य विशेष गरी युवाहरूका लागि फोटो र भिडियो बनाउन उपयुक्त स्थल बनेको छ।

स्मारकमा घुम्न आएका काठमाडौंकी पर्यटक सविना श्रेष्ठ भन्छिन्, ‘पहाडको छेउमा हरियाली र शहरको दृश्य एकै ठाउँमा देख्न पाइने यो ठाउँ निकै रमाइलो छ। रातिसम्म खुला हुने भएकाले हामी जस्ता बाहिरबाट आएका पर्यटकका लागि सहज भएको छ।’
स्थानीय व्यवसायीहरूका अनुसार सहिद स्मारकमा हुने भीडले आसपासका होटल, रेस्टुरेन्ट र साना पसलमा समेत व्यापारिक रौनक बढाएको छ। विशेषगरी शनिबार र बिदाको दिन यहाँ पार्किङमा गाडी अटाउन मुस्किल हुने स्थिति हुने गर्छ।
हेटौँडा उपमहानगरपालिका–११ का वडाध्यक्ष विष्णु थापाका अनुसार, ‘स्मारकलाई अझ व्यवस्थित बनाउन आगामी वर्ष थप सौन्दर्यीकरण र डिजिटल टिकट प्रणाली लागू गर्ने तयारी भइरहेको छ। यसले पर्यटन प्रवद्र्धनमा सहयोग पुग्नेछ।’
पार्कमा प्रवेश शुल्क नेपाली नागरिकका लागि रु. ३० र विदेशी पर्यटकका लागि रु. १०० तोकिएको छ। बालबालिका र विद्यार्थीका लागि छुट व्यवस्था पनि गरिएको छ।
राति १० बजेसम्म खुला रहने सहिद स्मारक अहिले हेटौंडा शहरको साँझको पहिचान बन्दै गएको छ। संगीत, प्रकाश र हरियालीको संगममा पर्यटकहरूले यहाँको वातावरणको आनन्द लिँदा सहिदहरूको सम्झनामा बनाइएको यो स्थान अब केवल स्मृतिस्थल मात्र नभई हेटौंडाको सांस्कृतिक पर्यटन केन्द्रको रूपमा विकसित हुँदै गएको छ।