रामेछाप । आयुर्वेद तथा वैकल्पिक चिकित्सालय रामेछापले घर घरमा गएर बिरामी जाँच गर्न सुरु गरेको छ ।
चिकित्सालयले साप्ताहिक रूपमा घरदैलो स्वास्थ्य शिविर अभियान सुरु गरेको छ । सो अभियान अन्तर्गत स्वास्थ्यकर्मीहरू घर घरमा गएर बिरामीको सामान्य स्वास्थ्य जाँच गरी उपचार गर्नुपर्ने बिरामीलाई चिकित्सालयमा बोलाउन लागेका छन् ।
यसरी घरदैलोमा गएर स्वास्थ्य जाँच गर्दा चिकित्सालयले दिने सेवाको बारेमा नागरिकको जानकारी पनि पाउने र रोग लागेका बिरामीहरूले समयमा नै उपचार पाउने भएकाले यो अभियान सञ्चालन गरिएको चिकित्सालयका प्रमुख दीपक कार्कीले बताए । कार्यालयमा बसेर बिरामी कुरिरहनु भन्दा घरमा नै गएर सेवा दिँदा रोगीको पहिचान भई सममा नै रोग निदानमा सहज हुने उनको भनाइ छ ।
चिकित्सालयले घर घरमा पठाएका स्वास्थ्यकर्मी प्रेसर तथा सुगरका साथै अन्य रोगको जाँच गरी थप उपचार गर्नुपर्ने भएमा चिकित्सालयमा बोलाउने गरेका छन् । यसरी घर घरमा आएर जाँच गर्दा निक्कै राम्रो भएको मन्थली–८ की वृद्धा मिस्री श्रेष्ठ बनाउँछिन् ।
कतिपय स्थानीयले आफूले एक पटक पनि प्रेस, सुगर लगायतका सामान्य जाँच समेत नगरेको बताए । जाँच गरिएका मध्ये धेरैमा सुगरको समस्या देखिएको घरदैलोमा जाँचको लागि गएका स्वास्थ्यकर्मीहरुले जानकारी दिए ।
चिकित्सालयले दिने सेवा बढेसँगै पछिल्लो समय बिरामीहरूको चाप बढ्न लागेको छ । सो चिकित्सालयले हरेक हप्ताको सोमबार बिहान निःशुल्क होलबडि चेक अप गर्ने गरेको छ । त्यस्तै बिरामी जाँच, निःशुल्क औषधि वितरण, निःशुल्क फिजियो थेरापी, अकुपञ्चर, ल्याब, पञ्चकर्म, पूर्वकर्म लगायतका सेवा चिकित्सालयले दिइरहेको छ ।
