काठमाडौं । हमास र इजरायलबीच तीन महिना अघिदेखि युद्ध चलिरहेको छ । युद्धमा हालसम्म दुवै पक्षका हजारौंको मृत्यु भइसकेको छ । इजरायलले हमासलाई पूर्ण रूपमा समाप्त गर्ने संकल्प गरेको छ । उही समयमा अहिले आतंकवादी समूह पनि आफ्नो गतिविधिबाट पछि हटेको छैन् । अहिले न युद्धको गति सुस्त छ,न जनताको जीवनको ख्याल छ ।
यसैबीच इजरायली सेनाको हवाई आक्रमणमा गाजामा दुई पत्रकार मारिएको खबरले सबैलाई स्तब्ध बनाएको छ । आक्रमणमा अल जजीराका रिपोर्टर वेल अल दहदौहका अर्का छोरा हम्जा वेल दहदौह मारिएका थिए ।
यसअघि अक्टोबरमा भएको आक्रमणमा उनले श्रीमती, एक छोरा, छोरी र नाति गुमाएका थिए । वेल अल–दहदौह आफ्ना प्रियजनहरू गुमाएपछि स्तब्ध छन् । कतारी सञ्चारमाध्यमले उक्त मृत्युलाई टारगेट किलिङको संज्ञा दिएको छ । हमासको कब्जामा रहेको गाजाको स्वास्थ्य मन्त्रालयले प्यालेस्टिनी क्षेत्रमा इजरायली हवाई आक्रमणमा दुई पत्रकार मारिएको दाबी गरेको छ ।
भिडियो स्ट्रिङगर मुस्तफा थुरिया र अल जजीरा टेलिभिजन नेटवर्कका पत्रकार हम्जा वेल दहदौहको कारमा यात्रा गर्दागर्दै मृत्यु भएको मन्त्रालय र डाक्टरहरूले दाबी गरेका छन् । उही समयमा अल जजिराले आफ्ना दुई पत्रकारको आक्रमणमा मृत्यु भएको जनाएको छ । स्वतन्त्र पत्रकार हाजेम रजब गम्भीर घाइते भएका छन् ।
हमजाका बुबा वेल अल–दहदौह गाजा पट्टीमा अल जजीराका ब्यूरो प्रमुख हुन् र हालैको आक्रमणमा घाइते भएका थिए । युद्धको प्रारम्भिक हप्ताहरूमा इजरायली आक्रमणमा उनकी श्रीमती र दुई छोराछोरी मारिएपछि उनी घाइते भएका थिए ।
ठुरियाले सन् २०१९ देखि एएफपीसँग काम गर्दै आएका छन् । कतारसँग सम्बन्धित च्यानलले हमास–इजरायल युद्धमा आफ्ना तीन पत्रकार गुमाइसकेको छ । क्यामेराम्यान समीर अबु डक्का गत वर्षको डिसेम्बरमा भएको आक्रमणमा मारिएका थिए ।
अल जजीरासँग कुरा गर्दै अल–दहदौहले भने, ’के भयो स्पष्ट छ । यो बालबालिका, महिला र सर्वसाधारणमाथि लक्षित आक्रमणको श्रृंखला हो । म यर्मुकबाट यस्तै एउटा आक्रमणको बारेमा रिपोर्ट गर्दै थिएँ जब इजरायली सेनाले नुसिरतसहित धेरै क्षेत्रहरूलाई निशाना बनाए । मलाई सेनाले सजाय नदिइ जान दिँदैन भन्ने लाग्यो र दुःखको कुरा त्यस्तै भयो ।’
अल जजीरासँग जोडिएको युट्युब च्यानलमा पोष्ट गरिएको भिडियोमा वेल अल–दहदौह आफ्नो छोराको शवको छेउमा हात समातेर रोइरहेको देखाइएको छ । छोरालाई गाडिएपछि उनले गाजाका पत्रकारहरूले आफ्नो काम गरिरहने बताए । उनले यहाँ के भइरहेको छ, विश्वले हेर्नुपर्ने बताए ।
न्यूयोर्कस्थित कमिटी टु प्रोटेक्ट जर्नालिस्ट्सका अनुसार इजरायल र हमासबीच अक्टोबर ७ मा सुरु भएको युद्धदेखि डिसेम्बर ३१ सम्ममा कम्तीमा ७७ जना पत्रकार र सञ्चारकर्मी मारिएका छन् । ती ७७ मध्ये ७० प्यालेस्टिनी, चार इजरायली र तीन लेबनानी थिए ।
