काठमाडौं । नेपाल ट्रेड युनियन कांग्रेसका प्रतिनिधिहरुले कांग्रेस नेता डा. शेखर कोइरालासँग भेटवार्ता गरेका छन् । उनीहरुले आगामी निर्वाचन अगावै पार्टीको १५ औं महाधिवेशन गर्न सुझाव दिएका छन् ।
ट्रेड युनियन कांगे्रसको गत कार्तिक २१ र २२ गते सम्पन्न केन्द्रीय समितिको बैठकले गरेको १३ बुँदे निर्णयहरु नेता डा. कोइरालालाई बुझाउँदै कांग्रेसको चालु बैठकबाट सम्बोधन गर्दै कार्यान्वयनका लागि पहल गरिदिन आग्रह समेत गरे ।
महासंघकातर्फबाट अध्यक्ष योगेन्द्र कुँवरको टोलीले डा.कोइरालासँग भेटवार्ता गर्दै ज्ञापनपत्र बुझाएको हो । आगामी फागुन २१ गतेको घोषित आम निर्वाचनमा सबै सहभागि हुनुपर्ने र त्यसका लागि कांगे्रसले नेतृत्वदायी भूमिका खेल्नुपर्नेमा कुँवरले जोड दिएका थिए ।
विहीबारको भेटमा टोलीले कांग्रेसले ताजा नीति तथा नेतृत्वसहित नियमित महाधिवेशन गर्दै आम निर्वाचनमा जानुपर्ने, स्वदेश तथा विदेशमा रहेका श्रमिकहरुलाई कार्यस्थलबाट नै निर्वाचनमा मतदानको लागि व्यवस्था गर्नुपर्ने, जेनजी आन्दोलन पश्चातको उद्योग कलकारखाना, पर्यटन तथा उद्योग कलकारखाना क्षेत्रका प्रतिष्ठानहरुमा प्रचलित कानुनलाई उल्लंघन गर्दै प्रतिष्ठानहरु बन्द गर्ने खालको समस्यालाई सरकारले तथा राजनीतिक दलहरुले गम्भीरताका साथ लिनुपर्नेलगायतका मागहरु पनि डा.कोइरालालाई बुझाएको थियो ।
त्यस्तै संविधानको मुलमर्म अनुसारको श्रमिकहरुको क्लष्टरलाई समेत पार्टी तथा सबै प्रकृतिका निर्वाचनहरुमा समावेश गर्नुपर्नेलगायतका १३ बुँदे निर्णित बुँदाहरु डा.कोइरालालाई हस्तान्तरण गरिएको अध्यक्ष कुँवरले जानकारी दिए । उक्त निर्णयहरु पूर्वअध्यक्ष र सल्लाहकारहरु सहितकोराष्ट्रिय समितिको बैठकले सर्वसम्मत रुपले निर्णय गरेको हो ।
ज्ञापन पत्र बुझदै नेता कोइरालाले सर्वप्रथम त एकिकृत तथा सर्वसम्मत तवरले आफनो धारणा ल्याएकोमा महासंघलाई धन्यवाद दिंदै सबै निर्णयहरु कार्यान्वयनका लागि सहजीकरण गर्ने प्रतिवद्धता जनाएका थिए ।
उनले आगामी पुसभित्र नियमित महाधिवेशन हुनुपर्नेमा जोड दिए । ज्ञापन पत्र वाचन गर्दै महासंघका महासचिव अजय कुमार राईले अहिलेको अवस्थाप्रति अत्यन्तै गम्भीर रहेको भन्दै बेरोजगारीहरुको संख्या बढेको, उद्योग कलकारखाना बन्दको अवस्थामा पुगेको, पूँजी पलायन हुने खतरा बढेकाले कांग्रेसले गम्भीर भएर काम गर्नुपर्ने औंल्याए ।
कांगे्रस भन्दा जेठो संस्थाका रुपमा क्रियाशील उक्त संगठनमा चार लाख सदस्य बढी सदस्य छन् । ट्रेड युनियन कांगे्रसमा २७ वटा पेशाकर्मी श्रमिक संगठनहरु आवद्ध छन् । दुई दिन अगाडि महासंघले नेपाली कांगे्रसका कावा सभापति पुर्ण बहादुर खडकालाई ज्ञापन पत्र समेत बुझाई सकेको छ ।
